Паліну Шарэнда-Панасюк трэці раз абвінавачваюць у непадпарадкаванні адміністрацыі калоніі (артыкул 411 КК), паведаміў "Медыязоне" яе муж, Андрэй Шарэнда.
"Прывялі дзяжурнага адваката і ўсё зрабілі пры ім," - сказаў Андрэй.
Прафсаюзная і грамадская актывістка мусіла выйсці на волю 21 траўня. Па словах яе мужа, апошнім часам у яе было некалькі спагнанняў, а таксама яна знаходзілася ў ШІЗА і ПКТ. Родныя спрабавалі перадаць ёй пасылку, але ім адмовілі, паведаміўшы, што "нехта ўжо прынёс прадукты раніцай."
2 траўня ў судзе Рэчыцкага раёна разглядалі справу аб прызначэнні Паліне Шарэнда-Панасюк прэвентыўнага нагляду, бо тэрмін яе зняволення падыходзіў да канца.
Паліну Шарэнда-Панасюк затрымалі ў студзені 2021 года, і суд прыгаварыў яе да двух гадоў калоніі па артыкулах аб абразе Лукашэнкі, прадстаўніка ўлады і гвалце або пагрозе гвалтам міліцыянту.
Яна павінна была выйсці на волю ў 2022 годзе, але яе асудзілі па артыкуле аб непадпарадкаванні адміністрацыі калоніі (артыкул 411 КК) і дадалі год да тэрміну. Другі раз родныя чакалі яе вызвалення 6 жніўня 2023 года, але яе зноў прыгаварылі да года калоніі па тым жа артыкуле.
Read this text in eng or рус