11 лістапада на «Віцебскдрэве» адбылося надзвычайнае здарэнне. Вядома пра тое, што 35 чалавек былі эвакуяваны, адзін работнік у цяжкім стане.
![Photo from Vitebskdrev website](https://static.wixstatic.com/media/8c9c6d_448d7ffe891643e182bff9419675a7c2~mv2.jpg/v1/fill/w_147,h_98,al_c,q_80,usm_0.66_1.00_0.01,blur_2,enc_auto/8c9c6d_448d7ffe891643e182bff9419675a7c2~mv2.jpg)
У цэху МДФ прадпрыемства «Віцебскдрэў» адбылася ўспышка пылапаветранай сумесі з наступным гарэннем. У выніку былі пашкоджаныя 250 квадратных метраў сценавых сэндвіч-панэляў звонку цэха.
Вядома, што 35 чалавек пакінулі цэх самастойна ў выніку спрацоўкі сістэмы апавяшчэння, паведамляе МНС. Аднак 49-гадовы работнік быў траўмаваны жалезнай арматурай, ратавальнікі яго дэблакавалі, пасля чаго перадалі медыкам.
Мужчына быў дастаўлены брыгадай хуткай медыцынскай дапамогі ў Віцебскую абласную клінічную бальніцу ў цяжкім стане з адкрытай чэрапна-мазгавой траўмай, пашкоджаннямі касцей твара, шматлікімі ранамі твара.
Следчы камітэт апытаў сведкаў інцыдэнту. "Для ўстанаўлення аб'ектыўных абставін здарэння створана група з ліку следчых следчага ўпраўлення і крыміналістычнага аддзела абласнога апарата", – дадалі ў СК.
Выбухі пылапаветранай сумесі ў дрэваапрацоўчых цэхах нярэдкасць для Беларусі. Улады павінны былі зрабіць сур“ёзныя высновы яшчэ з трагедыі, якая адбылася 13 гадоў таму ў Пінску. Тады ў 2010 годзе на "Пінскдрэў" у выніку выбуху і пажару загінулі 14 работнікаў прадпрыемства. 3 чалавекі атрымалі цяжкія раненні. Інцыдэнт стаў самай буйной прамысловай аварыяй у краіне па колькасці загінуўшых за некалькі апошніх дзесяцігоддзяў. Але як бачым, падобныя здарэнні працягваюць адбывацца.