Палітвязень і прафсаюзная актывістка Паліна Шарэнда-Панасюк пакутуе ад "хранічнага панкрэатыту сярэдняй ступені цяжкасці" — сур'ёзнага захворвання, лячэнне якога ва ўмовах пазбаўлення волі вельмі складанае. Аб дыягназе сваякі зняволенай даведаліся з афіцыйнага адказу адміністрацыі папраўчай калоніі № 24, дзе актывістка нядаўна адбывала пакаранне.
Цяпер Паліна Шарэнда-Панасюк утрымліваецца ў Гомельскім СІЗА, дзе супраць яе ўзбуджаная новая крымінальная справа па артыкуле 411 КК («Злоснае непадпарадкаванне законным патрабаванням адміністрацыі папраўчай установы»).
Муж палітзняволенай Андрэй Шарэнда распавёў "Свабодзе", як даведаўся пра дыягназ жонкі і чаму лічыць яе хваробу небяспечнай для яе жыцця.
«Захворванне вельмі небяспечна, паколькі разбурае падстраўнікавую залозу і прыводзіць да незваротных змен яе структуры. Мы не ведалі, што ў яе панкрэатыт, але атрымалі інфармацыю, што ў Паліны болі ў жываце і рэзкая страта вагі. Аднойчы яна настолькі схуднела, што важыла ўсяго 50 кілаграмаў. Аднак на ўсе звароты ў калонію нам афіцыйна паведамлялі, што Паліна здаровая і нібыта атрымлівае неабходную дапамогу ў поўным аб'ёме.
Тым часам у Паліны былі праблемы з печанню, ёй патрабаваліся пэўныя лекі, якія мы ёй дасылалі, але іх не перадавалі. Тады я звярнуўся ў Камітэт па ліквідацыі дыскрымінацыі ў адносінах да жанчын (CEDAW) ААН. Сёлета ў студзені мая скарга была зарэгістраваная, а ў сакавіку камітэт ААН запатрабаваў ад Беларусі тэрмінова прыняць часовыя меры для абароны Паліны. Беларускім уладам прыйшлося адрэагаваць на гэтае рашэнне, і толькі з іх адказу мы даведаліся, што ў Паліны хранічны панкрэатыт, прычым ён ужо ў сярэдняй стадыі. Але гэта страшны дыягназ: па сутнасці, у тых умовах, у якіх яна знаходзіцца, гэта як смяротны прысуд», - заявіў муж зняволенай.
Андрэй Шарэнда патлумачыў, чаму лічыць, што жыццю яго жонкі пагражае смяротная небяспека.
«Як мне патлумачылі спецыялісты і як напісана ў інтэрнэце, гэтае захворванне паступова разбурае падстраўнікавую залозу. Пры такім захворванні абавязковыя спецыяльная дыета, спецыяльнае лячэнне, адсутнасць нагрузак, добрыя ўмовы ўтрымання і строгі медычны кантроль. Усяго гэтага Паліна пазбаўлена.
Больш за тое, ёй наўмысна створаны зусім супрацьлеглыя ўмовы: працяглыя этапы, дрэннае харчаванне, ёй не даюць неабходных лекаў, блакуюцца перадачы ежы з дому. І гэта нягледзячы на тое, што яны добра ведаюць яе дыягназ. Вось чаму я кажу, што маю жонку на самой справе забіваюць павольна. Яе павінны былі вызваліць яшчэ ў траўні, але замест гэтага новая справа, расследаванне і этап у "Навінкі". Жахліва, што робяць з маёй Палінай!» - абураецца муж арыштанткі.
Comments