Новы кіраўнік ФПБ Юры Сянько даў справаздачу перад Аляксандрам Лукашэнкам аб дзейнасці праўладнага прафсаюзнага цэнтра. Лукашэнка прапанаваў прафсаюзам прыняць удзел ва ўборачнай кампаніі, пры гэтым адзначыўшы важнасць кітайскага досведу ў арганізацыі працы.
У сваёй прамове аўтарытарны лідар Беларусі ахарактарызаваў Федэрацыю прафсаюзаў як «дзяржаўных людзей, патрыятычных людзей у сваёй пераважнай большасці». Нягледзячы на забюракратызаванасць і шматлікія прэтэнзіі з боку насельніцтва, Лукашэнка заявіў, што ФПБ - "гэта народная партыя, народныя прафсаюзы."
У сваім маналогу ён адзначыў важнасць кітайскага вопыту для беларускіх прафсаюзаў, указваючы на працавітасць кітайскіх рабочых як прыклад для пераймання.
"Я заўсёды падтрымліваю працоўных, гэта сапраўды правільна. Але вы ведаеце, для таго, каб нешта патрабаваць, трэба працаваць. І вы бачылі, як працуюць кітайцы. Вядома, нашы не працуюць так і працаваць, мусіць, не будуць. Але калі б мы блізка былі да працы і аб'ёмаў, якія выконваюць кітайскія працоўныя, я думаю, мы б у некалькі разоў багацейшыя былі", - сказаў Лукашэнка.
У разуменні нязменнага кіраўніка Беларусі, улічваючы яго досвед старшыні калгаса, прафсаюзы заўсёды гулялі значную ролю ў арганізацыі працы: "Прафзвязы, асабліва ў сельскай гаспадарцы, заўсёды былі ў мяне правай рукой. І мы разам арганізоўвалі і сілкаванне, і абслугоўванне тэхнікі ў перыяд уборачнай кампаніі." Пра абарону інтарэсаў саміх работнікаў і іх правоў, на сустрэчы ўвага практычна не надавалася.
Даклад Юрыя Сянько выглядаў хутчэй як справаздача прадстаўніка сілавых структур: статыстыка, выкананне задач і агульнае бачанне сітуацыі. Лукашэнка не хаваў, што вопыт Сянько як дыпламата і былога кіраўніка мытнага камітэта цікавы яму. У адказ Сянько ўпэўнена заявіў, што "заўсёды гатовы да выканання пастаўленых задач".
Сянько таксама зазначыў, што прафсаюзы будуць працягваць працу як унутры краіны, так і на міжнародных пляцоўках, уключаючы ўзаемадзеянне з Міжнароднай арганізацыяй працы (МАП) для абароны беларускіх працоўных на міжнароднай арэне.
Некалькі тыдняў таму дэлегацыя ФПБ у складзе 12 чалавек прысутнічала на Міжнароднай Канферэнцыі Працы, дзе разглядалася пытанне выканання рэзалюцыі, прынятай па Беларусі. Аднак іх удзел быў без асаблівага эфекту. Патрабаванні рэзалюцыі і прымяненне 33 параграфа Статута МАП засталіся ў сіле. Удзельнікі канферэнцыі неаднаразова падкрэслівалі, што ФПБ не можа прадстаўляць працоўных Беларусі. Была нават пададзена заява аб адкліканні акрэдытацыі сябраў дэлегацыі ФПБ.
Варта адзначыць, што з 2022 года ў Беларусі дзейнічае толькі адна прафсаюзная структура - Федэрацыя прафсаюзаў Беларусі. Усе альтэрнатыўныя прафсаюзы былі ліквідаваныя, а іхныя лідары знаходзяцца ў турмах. На міжнародным узроўні ФПБ не разглядаюць як прафсаюз у класічным разуменні, а хутчэй як дзяржаўную структуру, якая кантралюе працоўных у аўтарытарнай краіне. ФПБ па сутнасці з'яўляецца інструментам улады, а не незалежнай арганізацыяй, якая абараняе правы працоўных.
Read this text in eng or рус