У рамках міжнароднай кампаніі «Прафсаюзны актывізм - не экстрэмізм», накіраванай на спыненне рэпрэсій у дачыненні да незалежных прафсаюзаў у Беларусі, мы атрымалі ліст салідарнасці ад нашых таварышаў з Нацыянальнага прафсаюза гарнякоў, металургаў і сталеліцейшчыкаў Мексіканскай Рэспублікі (SINDICATO NACIONAL DE TRABAJADORES MINEROS, METALURGICOS, SIDERURGICOSY SIMILARES DE LA REPUBLICA MEXICANA).
Ліст адрасаваны Асацыяцыі “Салідарнасць” і Беларускаму кангрэсу дэмакратычных прафсаюзаў (БКДП). У ім мексіканскія таварышы выказваюць шчырую падтрымку і салідарнасць з прафсаюзным рухам Беларусі, які перажывае беспрэцэдэнтныя рэпрэсіі.
"Мы ведаем, што, нягледзячы на жорсткія пераследы, вы працягваеце змагацца рашуча і мужна за годнасць і справядлівасць для працоўных", - гаворыцца ў лісце.
Гарнякі Мексікі падкрэсліваюць, што барацьба беларускіх прафсаюзаў важная не толькі для абароны правоў працаўнікоў у Беларусі, але і для ўмацавання дэмакратыі і сацыяльнай справядлівасці ва ўсім свеце. Яны асуджаюць пераслед, арышты і прыгнечанне свабоды аб'яднанняў, якія адбываюцца ў Беларусі, і заклікаюць міжнародную супольнасць не заставацца ўбаку.
“Мы працягнем выступаць у абарону працоўных і правоў чалавека ў Беларусі. Рэпрэсіі могуць перамагчы толькі калі мы будзем маўчаць. Мы не маўчым!"
Асобна варта адзначыць, што праграма, прысвечаная барацьбе беларускіх прафсаюзаў, будзе трансліравацца на радыё "Voz Minera", а таксама праз афіцыйныя старонкі мексіканскага прафсаюза ў сацыяльных сетках.
- Мы глыбока ўдзячныя за гэты акт міжнароднай салідарнасці. Такія словы падтрымкі ўмацоўваюць дух і надаюць сілы тым, хто працягвае змагацца за справядлівасць, - адзначыла Лізавета Мерляк, выканаўчы дырэктар Salidarnast e.V.
Далучайцеся да кампаніі на Labour Start - падпішыце зварот за вызваленне прафсаюзных зняволеных і спыненне рэпрэсій у Беларусі.
Read this text in рус or eng
Comments