Прадстаўнік ліквідаваных прафсаюзаў у Беларусі, выступаючы на Міжнароднай канферэнцыі Працы, заклікаў дэлегатаў канферэнцыі аказаць уплыў на сітуацыю з правамі працоўных у краіне і прагаласаваць за прымяненне 33 артыкула Статута МАП у дачыненні да Беларусі.
Максім Пазнякоў, прадстаўнік Міжнароднага саюза IUF і Беларускага кангрэса дэмакратычных прафсаюзаў (БКДП), апісаў дэлегатам канферэнцыі сітуацыю ў Беларусі. Ён адзначыў, што з пачатку 1995 года працоўны рух у краіне актыўна знішчаецца, а ўніверсальныя правы чалавека рэгулярна парушаюцца. Абмежаванні, накладзеныя на недзяржаўныя арганізацыі і незалежныя сродкі масавай інфармацыі, з'яўляюцца сур'ёзнымі перашкодамі для свабоды выказвання меркаванняў і права на аб'яднанне.
Ён зазначыў, што за апошнія 3 гады ў Беларусі была забаронена дзейнасць практычна ўсіх арганізацый, якія не падзяляюць погляды рэжыму Лукашэнкі. Больш за 1500 палітычных зняволеных знаходзяцца ў турмах, сярод якіх больш за 40 прафсаюзных лідараў і актывістаў. Некаторых з іх прызналі экстрэмістамі і тэрарыстамі. "Падобныя дзеянні непрымальныя для цывілізаванага грамадства 21-га стагоддзя, асабліва ўлічваючы, што Беларусь знаходзіцца ў цэнтры Еўропы".
Аляксандр Ярашук, адзін з пераследаваных лідараў, які раней займаў шэраг пасад у Міжнародным прафсаюзе IUF, Беларускім кангрэсе дэмакратычных прафсаюзаў і МАП, з'яўляецца яскравым прыкладам парушэння правоў і свабод прафсаюзных лідараў у Беларусі.
Генеральны дырэктар Міжнароднай арганізацыі працы, Жыльбер Унгбо, у сваім дакладзе падкрэсліў, што без захавання базавых правоў чалавека немагчыма сацыяльная справядлівасць.
– Вызваленне зняволеных прафсаюзных лідараў, вяртанне свабоды аб'яднання ў Беларусі і адраджэнне незалежнага прафсаюзнага руху – гэта мінімальныя ўмовы для пачатку дыялогу, пра які ўлады Беларусі так часта заяўляюць, – упэўнены беларускі прафсаюзны лідар. - Мы заклікаем дэлегатаў Міжнароднай канферэнцыі працы падтрымаць прымяненне артыкула 33 Статута Міжнароднай арганізацыі працы ў дачыненні да ўрада Беларусі. Гэта магчымасць унесці свой уклад у стварэнне сістэмы, дзе парушэнні прынцыпаў МАП не застануцца без наступстваў.
Максім Пазнякоў лічыць, што міжнародная грамадскасць не павінна заставацца абыякавай да сістэматычных парушэнняў правоў чалавека і прыгнёту прафсаюзаў у Беларусі. Падтрымка з боку Міжнароднай арганізацыі працы і міжнародных суполак будзе моцным сігналам для беларускіх уладаў аб тым, што парушэнні не могуць застацца беспакаранымі.
– Гэта ваша магчымасць падтрымаць тых, хто рызыкуе сваёй асабістай свабодай за галоўную каштоўнасць МАП, за свабоду аб'яднання. Менавіта зараз сябры МАП павінны быць адзіныя і салідарныя ў сваіх дзеяннях у абарону свабод, дэмакратыі і сацыяльнай справядлівасці, – звярнуўся да дэлегатаў беларускі прафсаюзны дзеяч.
Беларусь таксама гучала і ў дакладзе прадстаўніка Украіны Васіля Андрэева, як краіна – ваенны саюзнік Расіі, дзе парушаюцца правы прафсаюзаў. Трэба адзначыць, што 15 чэрвеня ў Жэневе адбудзецца акцыя пратэсту, з патрабаваннем вызвалення прафсаюзных лідараў Беларусі. У якасці ўдзельнікаў і арганізатараў акцыі выступаюць глабальныя прафсаюзныя аб'яднанні.
Comments